Surat Buat Kristina

"Surat ini ditulis anak saya, per tanggal 03 April 2007, ditulis dalam bahasa Batak Karo"

Puji syukur sikataken man Tuhan ta Yesus Kristus, si labo pernah berubah, mbarenda, genduari ras rasa lalap. Ia saja nge tetap Tuhanta si nggeluh ras erkuasa. Amin

Emaka gelah ibas keadaan sehat-sehat lah kam duana, Bapak ras Mamak i dapeti surat enda, bage kape Rahel, ras agi kami Kristina, gelah min kuasa Tuhan sila ersibar e banci berlaku ibas geluh na bage kape masa depanna. Em rusur sitotoken ras siendeskan man Tuhan.

Kami kerina i Jakarta lit nge ibas keadaan sehat-sehat. Permenndu, Pera, Ulih, kerina nge ibas perlindungen Tuhan. Kam pe duana, jagalah kesehaten ndu, ula rubat-rubat, tetap jaga persekutuandu, melala kam rende-rende muji Tuhan, ras pala-palai ka mbaca firman Tuhan e.

Adi reh sehat na idahndu Kristina, suruh ka ia ikut mbaca Firman Tuhan, tapi ban sorana ningen man ia, encege dua na kam mbegikenca. Banci saja nge kari, arah ia mbaca Firman Tuhan e, kuasa Tuhan erdahin bas ia. Perlu nge cubaken ….

Sebab labo kap Tuhan ndai tanggung-tanggung erdahin, ras labo Ia memandang rupa nina, ma rusur nge begi ndu duana khotbah e arah pendeta nta i gereja.

Em lebe surat ku enda. Labo aku nge-khotbahi kam duana, tapi enda hanya sebagai sarana saling "membangun" antara kita sesama anak Tuhan. Bujur ras Mejuah - juah.

Tiket

" Ini merupakan sebuah surat yang dikirimkan anak saya, ketika akan melakukan kunjungan berdua dengan istri ke Jakarta Tgl. 3 Maret 2007. Surat ditulis dalam Bahasa Karo "

Mejuah-juah
Gelah min kam dua na ibas keadaan sehat-sehat saja. Bage kape Kristina, gelah min reh sehatna tiap-tiap wari, ras Rahel pe reh mehulina, em toto ta man Tuhan Dibata. Amin

Bapak ras Mamak, Ibas amplop enda tiket ndu ku Jakarta ndai. Ula kam lupa duana mbaba tiket enda ku Polonia sangana kari kam berkat ku Jakarta. Tuduhken tiket enda ku petugas i bandara sopelenga kam masuk ku bas. Tiket enda lit dua, sada kari tagangi mamak, sada bas bapak. Entah kari bene sada, lit denga pertading na bas kam.

Berkat kam Medan nari ku Jakarta emekap Tanggal 3 Maret 2007, wari Sabtu, jam 8.30 er pagi-pagi. Emaka jam 7 er pagi-pagi kam dua na enggo seh i Polonia. Ula kam terlambat!! Adi na terlambat, e nggom kam duana tadingken pesawat e. labo enda seri bagi kita nangkih Sinabung Jaya entah pe Sutra i Kabanjahe.

Mengenai kemulihen ndu pagi Jakarta nari ku Medan, la perlu pikirkendu, e aku pagi ngurussa. Em lebe bas aku nari, jaga kesehatenndu duana, aku pe ras permen ndu lit nge ibas keadaan sehat. Bage ka pe anak ndu singuda e sehat-sehat nge ia. Bujur.